呢份上個星期先出爐嘅「大廈優質供水認可計劃」，入面竟然連食水有鉛毒嘅啟晴邨都有份。啲水有毒都過到優質認可，咁即係唔識字去考DSE都會攞A㗎啦，咁你叫你呀媽唔好再問你DSE點解考成咁啦，因為世事嘅嘢係冇得解㗎。

呢個水務署「大廈優質供水認可計劃」目的係「增強本港居民及海外訪客對自來水質素的信心」、仲話個準則係「測試結果必須符合有關水質指標的可接受限度」，咁唔係佢自己屋企，個可接受限度又可能會高啲嘅。

仲有入面個賞晴樓就係含鉛量超標超成2.8倍嗰度呀，咁都有證書，到底係唔係是旦搵個人飲啖冇即刻死就叫合格㗎喇？

不過學阿食物及衛生局副局長陳肇始咁講，相比世界其他國家個案，呢啲樣本超標水平唔算太高啫，所以冇事嘅，唔使驚，只係技術性超標嚟啫。

資料來源：水務署大廈優質供水認可計劃