2015年07月16日 星期四
【Cue棍禁上火車】有乜嘢唔拎得上車？
喺香港做運動員真係好L慘，唔好話搵唔到錢，如果啲司機執正嚟做，佢哋隨時連車都冇得搭，要行路去練習，真係陰公豬。點解？
桌球
最近先有新聞話香港前亞運金牌選手陳國明因為佢支倚天Cue長過130cm而犯咗地鐵規例，唔單只冇地鐵搭，仲收埋警告信，再犯就隨時監都有得坐。
咁今日網友Lung Yim轉載嗰張相話喺地鐵裏面見到有把關刀又點計先？
保齡球
根據城巴同新巴嘅乘客須知，乘客係唔可以拎啲重過5公斤嘅嘢上車，咁即係話如果你係一個保齡球手，用緊11磅嘅保齡球就唔好意思嘞，唔該請你落返車。
平時咁多水貨客帶埋佢哋啲水貨上車，佢哋啲貨應該係4.9999999公斤重，度得好準嘅（除非唔係）。
棒球
香港鐵路附例27a就話唔可以帶啲對任何人造成傷害嘅嘢上車，咁支扑得死人嘅棒球棍唔知又可唔可以拎上車呢？
不過我諗應該冇問題啩，嗰啲會轆嚟轆去嘅喼都上得車啦。
唉，好心啲公共運輸公司就包容吓香港啲運動員啦，你估佢哋個個都好似外國啲運動員咁有車揸咩。
所以，喺香港做運動員（其實你同我都係），如果冇架車，就行路當熱身啦。
資料來源：
