低調得嚟出色，沉默得嚟出眾嘅劉江華終於升職啦！佢由立法會議員兼民建聯副主席變成政制及內地事務局副局長，今日終於升正做民政事政事務局局長喇。可以升到呢個萬人之上嘅職位，一啲都唔簡單，我哋就嚟睇下佢嘅成功之道啦！

非凡政治智慧

劉江華1998年至2012年做咗四屆立法會議員咁多，一定係有非凡嘅政治智慧。就好似佢當年嘅投票決定，嗰啲咩正視七一訴求呀六四呀勞工集體談判權呀跟進雷曼事件呢啲小事呢，佢都全部唔會浪費精力去支持嘅，但係好似高鐵呢啲對香港影響咁遠大嘅事情呢，就肯肯定要即刻贊成啦。

永不放棄精神

雖然佢表現咁出色，但係好可惜劉江華喺2012年失手落選立法會選舉。一班網民並冇因此而忘記佢，仲為佢成立咗「全港各界熱烈慶祝劉江華落選委員會」嚟激勵佢。所以劉江華亦冇放棄佢嘅公僕生涯，話咁快喺同一年就變身上任政制及內地事務局副局長喇！

辯論表現出色

做官嗰時佢嘅表現一樣係下下震驚全港。大家一定都仲記得，上年係萬惡嘅佔領運動期間，佔中引晒全香港嘅精神病人出嚟，好在劉局長喺當中保持清醒，成為市民公認嘅最佳辯論員，講得好過同場所有高官同司長，表現深刻到令佢升職進入直路呀！

人際關係良好

係官場人際關係好重要，雖然劉局長就冇做民建聯副主席好耐，但係佢就同而家個主席好親密喎，正所謂立法會中有人好辦事，人脈關係好就自然容易升官發財啦！

所以話一個人能夠咁成功係有原因嘅，佢嘅出色之處真係一個垃圾桶都裝唔晒，大家記住要好好學習呀！