《念念不忘》三部曲最慘係邊個？係耿耿於懷嘅資深兵？定係畀毒L煩足十年終於頂唔順要爆嘅女神？全部都唔係呀？最最最慘係邊個肯肯定係佢。

你以為十年來最耿耿於懷係念念不忘三部曲個Juno？其實係《扯線風箏》嘅吳日言呀！

我哋嚟睇下吳日言嘅念念念念念不忘五部曲啦！

呢個故事，要由11年前2004年，亦即係吳日言出道講起。當年佢同首《扯線風箏》同Juno嘅《耿耿於懷》成為一pair嘅作品，仲拍咗個平行時空mv，都係只差一點點先相遇之類嘅情節。

之後，話咁快2009年，同Juno同唱片公司嘅吳日言畀人解約，記者問Juno有冇「撐」佢，吳日言竟然答：「撐我，他撐我落海。」（下？咁大仇口？）

再六年後，好快就嚟到今年。Juno出《耿耿於懷》續集 《念念不忘》，吳日言竟然公開自薦想做MV女主角，同《耿耿於懷》再續前緣呀。

不過，殘酷嘅現實係，佢公開自薦都係衰咗......

到噚日，Juno出咗《念念不忘》同《羅生門》，到最後搵咗呀Kay做三部曲大結局嘅終極女神，仲要係同Juno合唱。而吳日言竟然......竟然KEY自己個樣上去！？呢個故事話畀我哋知，真愛真係可以衝破時空㗎！

呢一幕......真係見到都戥吳日言心酸。

所以，最念念念念念不忘同耿耿耿耿耿於懷嗰個，係吳日言呀！算啦，人哋都搵咗女神Kay，古語有云「那動人時光　不用常回看」，你都係看開啲啦施主。