《羅生門》首歌喺呢兩日之間成為全城熱聽榜首，除咗一眾毒L感同身受，日J夜J自歎自憐，感激有人寫出佢哋嘅心聲， 等佢哋長9以嚟嘅壓抑同鬱結終於可以得到發射洩之外，原來港女都一樣……

呢個一直埋藏咗喺港女心底裡面嘅問題，終於，喺呢首歌爆紅之際同時爆發。平時，佢哋淨係識得問男朋友：你愛唔愛我？你有幾愛我？你係咪淨係愛我一個？……今日，佢哋趁住同男朋友和平理性、以純音樂學術角度咁討論呢首歌嘅時候，技術性咁問咗一條比「你阿媽同我跌落海，你會救邊個先？」更難答嘅問題，就係「你心入面究竟有冇一個B餐，謝安琪嘅存在？」

世界突然喺呢秒定鏡咗，過去嘅事全部冒上，下一秒，港女再打蛇隨棍上，追問「咁我似邊個？」……

唉，答你似阿KayBB又死，答你似莫文蔚又死，答你似吳日言就仲死……其實問咁多做乜吖，畀你知道你係邊個咁又點？你點知道呢道唔係另一道羅生門？睇嚟呢首歌，唔止係毒L嘅哀歌，同時都係（港男對）港女嘅禁歌！

PS. 以上乃係某毛孩喺九展現場聽到嘅真實對話，而毛孩相信，呢段對話應該喺好多個平行時空之中出現。