2015年07月26日 星期日
「蠢人永遠做蠢事，你永遠話唔到佢嘅」
曾德成同鄧國威被離職已成事實，不過自從呢個消息發放咗之後，大家都喺度估估吓，有傳係因為曾德成搞唔好青年工作，而阿鄧生就同公務員關係麻麻地，咁所以其中一個位就由喺佔領期間非常有作為嘅最佳辯論員流肛華頂上。
呢個分析非常中肯，見解毒有，將每個人物嘅性格特徵同埋功功過過既簡單又直接咁同廣大巿民解釋清楚，令大家明白正苦喺調人方面係幾咁有智慧，能夠知人善任，以巿民大眾嘅福祉為依歸。之但係，阿真曾主席竟然公開批評正苦中人，話「我認為責任未必喺行政長官度，有啲蠢人蠢到不得了，喺度自作聰明，周圍放料……」
又話佢哋「蠢人永遠做蠢事，你永遠話唔到佢嘅」，喂，作反呀？
佢仲嬲豬到特地為咗呢班豬一般嘅隊友喺Facebook出post。
我都好認同責任唔喺689度嘅，係啲蠢人去晒熱廚房度做嘢之嘛。不過真主席又唔使動真氣嬲嬲豬嘅，田少一早都已經講過呢班智將朋友嘅問題就係「人蠢冇藥醫」㗎啦。
唉，最衰你而家老咗十年啦，如果唔係咪可以出嚟選特首，搵返啲醒目豬入去囉。
來源：蘋果日報
