偉大嘅祖國一向都想推動足球發展，仲希望有朝一日成為世界前列。喺1月嗰時，習總嘅足球方案就通過咗，究竟祖國嘅足球會向咩方向發展呢？

球迷

球迷可以話係一支球隊嘅米飯班主，冇咗球迷嘅支持，球隊嘅收入一定大減。上個禮拜，中超嘅皇牌前鋒郜林面對敵方球會球迷嘅熱情問候底下，就喺佢臨上車之前向佢哋掟球鞋，等佢哋可以留為紀念。如果祖國聯賽嘅球員個個都好似郜林咁，球迷一定越嚟越多啦。

球證

祖國嘅足球成日都畀人笑係假波，為咗改變呢個咁壞嘅印象，祖國嘅足協就決定畀球證有更多嘅權力。今年嘅6月頭就有場中超比賽，有教練唔滿意球證嘅判決，同個旁證嘈，結果個教練連眼角都畀個旁證打爆埋。球證可以有咁超然嘅地位，公信力就可以因為咁而提高。

球員

講嚟講去，踢波最重要都係班球員，除咗好波之外，心態亦都好緊要，踢波就最緊要有鬥心。噚日喺廣西就有場友誼賽，由香港明星足球隊對住廣西嘅東興隊。下半場嘅時候，東興隊已經冇得追，但係佢哋仍然充滿鬥志，不斷搶攻。但係好可惜，根據祖國網民所講「香港人的脾氣和性格真不是我們大陸人所能理解和接受」，最尾竟然猛烈進擊，令場波未踢完就要畀人腰斬。

來源：騰訊體育, 蘋果日報, 經濟日報, 新浪競技風暴