旅遊業不嬲都係香港嘅經濟支柱，當年香港經濟唔掂就全靠阿爺嘅恩典，開放自由行嚟香港，香港先可以吊住條命，唔係香港就晨早變咗死城。但係今日就有報導話今年7月上半個月嘅強國遊客比上年同期就跌咗33%。呢個咁嘅消息真係嚇死人，為咗可以令到強國人繼續嚟香港，香港人係時候要叫我哋效率高嘅政府做吓嘢。

交通

香港係出晒名嘅購物天堂，係人嚟到香港都一定大手入貨啲咩奶粉、手提電話乜乜乜，攞住一袋二袋，交通嘅方便就好重要。

的士改革

既然香港人又成日Hi班的士佬，班的士佬又唔想車班香港人，咁就唔好勉強，政府應該當機立斷即刻宣布香港啲的士以後就只車強國人，仲可以同阿爺要求埋香港的士可以入到中國境內，咁樣就算強國人買多咗嘢都可以搭到的士返到大陸嘅屋企啦。

住宿

香港時不時都有強國嚟嘅遊客不滿住宿嘅安排，大鬧旅館。如果就係因為咁樣而令到班遊客即日走人，錢都搵少幾轉，你話幾慘呢。

公居變酒店

雖然香港有好嚴重嘅土地問題，但係為咗落嚟打救我哋嘅同胞又有乜計？香港人近排成日都驚啲公屋嘅食水含鉛，既然佢哋有屋住都唔識感恩，就索性趕晒佢哋走，然後畀啲強國遊客住，可能佢哋對嗰度啲水仲有多份親切感添。

景點

如果有值得去嘅地方，遊客就自自然然嚟香港睇吓，面對住文化質素咁高嘅強國遊客，香港就一定要有高質素嘅景點先可以吸引到佢哋嚟香港。

18區跳老母

大媽舞除咗係中國文明嘅代表之外，亦都令全世界瘋狂，香港政府應該把握機會邀請強國大媽嚟香港長駐喺香港18區定時演出，除咗可以吸引強國人嚟香港同大媽跳老舞之外，仲可以吸引埋世界各地唔同嘅遊客嚟香港欣賞大媽美妙嘅舞姿。

來源：香港經濟日報, 螞蜂窩, 蘋果日報, AM730, 前瞻網