2015年07月29日 星期三
插水的藝術
插水原本只會喺球場度出現，但係經過時間嘅洗煉，插水已經成為咗一門專業嘅藝術，可以用喺唔同嘅地方。不如就趁呢個機會睇吓唔同人真假難分嘅經典插水時刻啦。
李華度
喺2002年嘅日韓世界盃，巴西對土耳其嘅比賽，土耳其嘅球員就想畀個波李華度，點知就踢咗落佢隻腳度。跟住神奇嘅事就發生喇，李華度即刻掩面倒地！嗱，你哋唔好話人插水呀，可能係土耳其個球員好腳力得滯，省中咗李華度隻腳，咁鬼死痛，就梗係掩面倒地啦。
大衛雷斯
2013年，喺英超曼聯對車路士嘅賽事中，臨完場嘅時候，曼聯就有個球員做咗個粗野嘅攔截，最尾仲畀球證紅牌趕埋出場。唔好因為見到大衛雷斯倒地之後喺度笑就話佢插水，其實佢只不過係興幸自己大難不死，由個心度笑出嚟咋。
盧醫生
嗱，喺開頭就講過呢啲難分真與假嘅插水可以應用喺唔同情景，好似噚日盧醫生喺人群之中直插倒下咁，再睇吓佢跌咗落地之後迷惘嘅眼神，呢鋪都真係可以話係為港（大）爭光。
既然插水已經成為咗一個專業，唔知奧運幾時會有花式插水呢個項目呢？如果真係有嘅話，唔知盧醫生又會唔會參加，為香港攞返塊牌呢？
