胸部其實係男係女都有，但女性嘅胸部就往往成為世人嘅焦點。啱啱過去嘅星期六日，唔同地方都舉行咗同女性胸部有關嘅集會。

加拿大早幾日有一場波濤胸湧嘅集會，唔好心邪呀，人哋係支持女性無上裝！參加人士除咗高舉「胸部不是炸彈」、「赤裸不是性慾」等等嘅標語，仲身體力行，男男女女都露出胸器（好危險喎）。點解會有場咁嘅集會？原來加拿大安大略省早喺96年已經通過法律容許女士當眾袒露上身（真係㗎？我想移民呀喂……），但係佢哋有個慈母最近竟然一反人性，要求3個女女著返衫，搞到啲人嬲豬囉。

強國前幾日都有場3萬人相親大會，參加嘅靚女會即場「金盆」洗臉，洗走所有裝甲，希望搵到睇心唔睇樣嘅如意郎君。不過，大會同時又有「量度胸圍」環節，畀男仔用軟尺幫女仔度下胸圍，係咪即係就算唔睇樣都要睇身材？BTW，第一次見就咁親密，祖國喺身體自主方面仲走得前過洋人呀，唔好再話祖國封建喇。

噚日，香港都有婦女團體發起遊行，抗議「光復元朗」遊行嘅女示威者「以胸部襲警」定罪。參加者無論係男定女，都會喺外衣出面戴上胸圍，佢哋唔係扮超人底褲當面褲著呀，而係象徵保衛身體自主，表示不滿法庭裁決。加拿大只係爭取赤裸，強國就第一次見都可以度胸圍，而香港女仔個胸仲可以當「胸」器用，簡直領先全宇宙。

資料來源：BBC、中新網、NOW新聞台