上個禮拜二，港大校務委員會開會嗰陣，無啦啦有班廢青學生衝咗入去，令到阿茂大夫被插水，需要送院驗傷。

佢被插水嘅時候抱住右邊膝頭，入院之後為咗穩陣起見啦應該，梗係順手驗埋脊椎有冇事啦。

而出院嗰陣佢就變咗左手揸拐杖，唔知是咪又驗到有新傷呢？不過可能佢份人比較厚道，雖然（好似係）比學生踢咗一腳，但都唔想再踩多學生一腳，所以自己默默忍受冇再話畀大家知啦。

之但係成件事過咗差唔多一個禮拜啦，前中大醫學院院長，現任港大校委會成員李國章無啦啦又爆大鑊，原來佢當日都有份被襲。不過佢當時就選擇咗低調處理，未有即時跌低、或者任何痛苦嘅表情，以至全世界都唔知道原來佢都係傷兵。

謝天謝地！李大夫被襲完之後仲可以自行驗傷，而且一切平安，冇畀人打爆個腎，小便冇血！真係好彩咋，你都唔係唔知班廢青幾暴力㗎啦。

來源：無綫新聞、蘋果日報