我知你哋實好多人會話我，做乜仲睇TBB，但我想學陳永業講返句：我每日真係學到好多嘢呀！好似之前播出嘅新劇「樓奴」，又教我哋英文啦！

你冇睇錯，左上角紅色圓點旁邊係寫住Red！TBB好叻豬咁食字，將紅色”Red”同錄影”Rec”完美融合埋一齊，等你哋班廢青同時識到兩個英文字，幾有教育意義呀！今次真係長知識鳥！

其實TBB嘅劇不嬲都會突破盲腸，好似古裝劇嘅對白會出現英文，絕對係比人行先一步，創立潮流嘅大膽嘅嘗試嚟！你哋笑TBB係因為佢行得太前，但其實係你哋追唔切呀！

旺角嘅英文名係Kwun Tong！咁觀塘係咪叫Mong Kok？毛毛讀得書少，真係識條鐵呀！

唔止英文，科技方面TBB都好叻叻㗎，好似C drive上網大法就係TBB發明，簡直震撼13億人呀！

所以話，睇TBB學到嘅嘢，仲多過教育電視呀！