Victor嘅40萬求婚大作戰引起全城熱講，拍緊拖嘅豬妹就問仔仔可唔可以即刻求婚，做咗人妻嘅就問老公仔可唔可以吊…… banner 補求婚呀。有位讀者話見到網友一個霸氣comment：「其實求婚就是一句話4個字，講完」，佢就弱弱咁問喇，到底，係邊4隻字呢？

一個簡單而隆重、毒舌又不失葡萄嘅徵文比賽咁就開始咗。正正常常，都係話「嫁畀我啦」、「結婚好冇」呢啲行嘢㗎喇。咁行，豬妹會唔會嫌冇新意，覺得下半世都會悶死咁咪弊？

睇嚟呢位哥仔相當毒舌，冇返咁上下內功應該唔會毒到咁出面！好毒，不過毛毛鍾意！

有人話，同居同結婚嘅分別在於，結咗婚易啲抽到公屋喎！不過而家好多精叻豬妹要男友有樓先肯諗下嫁，如果男友求婚嗰時直接啲話自己有樓揸手，豬妹咪直接啲咁話嫁囉，使乜又直昇機又banner啫，分分鐘連鑽石都慳返。但毛毛睇返而家啲樓盤，單身免問喎…… 唉，求婚對毛毛嚟講，唔知係「這些機會」定「首先你要」呢？