平時喺旺角成日食街頭小食，又熱又多人，毛毛豬真係食到悶囉。今日有隻毛孩話要畀啲驚喜我，帶我上去一間商業大廈食特色甜品！我就即管睇下～

 一行入餐廳就聽到舒服嘅輕音樂，成個人即刻放鬆晒。餐廳地方闊絡，你鍾意坐bar枱，望住甜品師傅炮製甜品又得；坐喺窗口邊嘅梳化，欣賞鬧市嘅風景又得！

去甜品店梗係食甜品啦，成個餐牌都係英文，點餐嗰陣要講英文，感覺巧勁巧high class唷～毛毛豬揀咗「ruby peach」同「caramel banana」。

Ruby peach真身係一個粉紅色嘅大波波，切開佢裡面有桃味嘅mousse，伴碟仲有啲都係用桃做成嘅啫喱，同埋玫瑰花脆脆。少女心嘅毛毛豬真係覺得個甜品巧粉紅巧襯自己！

另一碟Caramel banana就仲犀利！甜品上面有塊藍色糖膠，師傅會喺你面前點著塊糖膠，夠晒火辣！黑色嘅波波其實係朱古力同香蕉味嘅Brownies，底下黃色嘅係蜜糖雪糕。毛毛豬覺得偏甜，不過Brownies好鬆軟㗎！

食完嗰陣老闆仲問毛毛豬啲甜品好唔好食，有咩要改善呀咁，嘻嘻。而家餐廳仲有set，叫甜品送飲品呀。價錢可能偏貴咗少少，所以一定要搵埋隻毛孩出嚟食，你懂的 :p

餐廳資料：
Doux
地址：九龍旺角彌敦道726號18樓
營業時間：1pm-12am
電話：2808 2520