女人不嬲有兩個胃，一個食正餐（通常唔會食太多），一個食甜品（通常會食好多）。毛毛豬行行下街，見到間新開嘅紐約蛋糕店大排長龍，個肚又餓啦~快啲捉毛毛去排隊先！

來自紐約嘅Lady M出名在於有唔同味道嘅千層蛋糕（即係Mille Crêpes呀，法文嚟，毛毛豬都係識讀少少咋）。一層可麗餅再加一層奶油，真係諗起都濕晒，我話個口呀！而家就等毛毛豬一層一層剝開佢的cream啦～

首先當然要試下招牌原味千層蛋糕($68)～你問毛毛豬原味即係咩味呀？我都唔知呀，食落有少少焦糖味咁囉。另一款係綠茶味($75)，呢個就濃味好多，表面仲灑咗好多綠茶粉，每食一啖都好滿足～

你哋睇下個蛋糕幾厚，仲厚過毛毛個銀包呀！

餐廳仲設有上網同電話預訂蛋糕服務，你鍾意成個蛋糕買又得，單件買返屋企嘆亦得！不過留意返要３日前預訂，毛毛豬偷聽到8月已經full booking啦！

餐廳資料：Lady M

地址: 九龍海港城海運大廈二階 OT 215K 號舖

電話: 2873 2356

網頁: Lady M官方網頁