唔係呀嘛，又有騙案？唔通騙徒真係無處不在，處處都在？今次唔扮郵差乜乜乜，而係扮傻喎！

有位元朗街坊話同老婆婆行行下街，遇到懷疑企圖行騙三部曲！當時仲要日光日白，周街都係人！

第一步：突然有人好用力咁捉實佢老婆個背囊

第二步：當畀人見到，就會有個疑似係阿媽嘅女人叫個男仔放手

第三步：跟住又會有個和事佬好多咀咁話個男仔有病，叫佢哋唔好介意

之後whatsapp就開始瘋傳一段叫大家小心有人扮傻搶背囊嘅message。有可能係有其他人都遇到同樣嘅騙案啵！大家真係要小心小心！

有啲網友都話喺元朗或者其他地方經歷過呢三部曲！不過亦都有人話覺得個小朋友真係有病，希望大家唔好話佢哋係騙徒。毛毛唔知真相，只係知唔想以後都要好似強國同胞咁將個背囊孭喺心口驚畀人搶咋！

資料來源：status/盡在元朗、whatsapp/盡在元朗