世人已經冇嘢唔可以喺火車度做，食杯麵又得，連食煙都得呀！

噚日有個四眼哥仔畀網民拍片放上網，佢唔係因為冇讓座呀，而係因為食煙！喺片入面可以好清楚咁睇到佢點樣吞雲吐霧，淡淡定定咁enjoy佢枝煙，唔講仲以為拍緊MV啵。

喺片入面四眼哥仔全程都冇出聲，只係繼續chur多幾啖。睇返拍片人嘅caption，原來佢哋有啲精彩對答係條片冇錄到㗎！

拍片人：先生，呢度唔可以食煙㗎，請你整熄支煙。

四眼哥仔：你邊位啊，關你咩事啊？

拍片人：我邊位都好啦，你影響到人，你知嗎？

四眼哥仔：哦，食完先啦！

拍片人：你係咪唔整熄佢！

四眼哥仔：咁點呀？

拍片人：得！無問題，你等等。

跟住拍片人本身好嬲嬲豬，想攞滅火筒射L爆佢條L樣，但就有位金髮哥哥仔話唔好搞佢，拍片好喇。

未完㗎，仲有下文，煙熄了會更震憾與期待呀嘛！佢哋喺九龍塘站落咗車，當有港鐵職員問四眼哥仔嘢嘅時候，佢即刻跑走咗！個職員就用大台啲JING CHA最常用嘅捉賊方式，大嗌「咪走，企喺度」，跟住仲同拍片人佢哋講「唉，追唔到㗎喇」！明嘅明嘅，受人二分四，使乜咁搏喎？

呢個時候，四眼哥仔梗係已經一縷輕煙咁消失咗啦！好彩最後都喺月台捉到佢去報案室！四眼哥仔搞咁耐都仲留喺月台，好似有心玩catch me if you can咁嘅？

資料來源：Andy Lau