我哋可能覺得放暑假班老師會冇嘢做，其實咁諗就錯喇，Miss 阿Sir一樣要開會㗎，不過係吐苦水大會。90後戴Sir話喺大會上聽到一個名校老師話有神獸家長要求校車兜入去屋苑最入嗰棟接佢個寶貝仔。

其實晨早流流要個小學生行成足足5分鐘出去巴士站等車，係好唔人道㗎，啱啱瞓醒就要行咁耐，容乜易用晒儲咗成晚嘅精力，冇心機上堂㗎。

得到第一階段勝利之後，神獸家長就繼續進攻，話個時間太早喇，仔仔要瞓多陣，不如校車調下屋苑個次序，但萌塞嘅校車公司話唔制喎，呢位家長就提出極有建設性嘅提議！就係帶仔仔去最尾個站上車呀！

校車公司唔肯變通，呢位家長就自己變，幾靈活呀，學校係好應該補貼的士錢去鼓勵佢！搞咁多嘢都係為咗畀仔仔瞓多陣，養足精力返學，同時又keep到同書友仔一齊搭校車嘅集體回憶，母愛係偉大嘅！

資料來源：90後教師決戰怪獸家長