天津發生大爆炸，英勇可嘉嘅強國首善陳光標帶領救援隊去到現場做義工，幫手清理廢墟。標哥成個過程淨係戴口罩，做咗清潔大隊長30幾個鐘之後竟然唔斯服要送院呀！

強國首善標哥係邊位呢？好似有啲熟，但又唔認得。佢咪曾經賣過新鮮空氣罐頭，同埋去過台灣霸氣派錢嗰個大粒佬囉。佢仲話過，為毛主席家鄉建設，願意捐晒冚家所有財產！對黨真係一片忠心㗎！

標哥話：「大難當前，救人是首要任務。由於現場環境複雜，救援工作千頭萬緒，我們的工程隊一定堅決服從政府的一切安排和調派，做到幫忙不添亂，同時確保自身安全。」佢今次確保唔到自身安全都衝入災區幫手，呢份高尚情操同為人民服務嘅精神，好值得我哋學習！講真，又發財又立品，有幾多個人做到呀？

咦，咪住，國家話過空氣質素正常㗎喎，標哥又點會中度中毒呢？冇可能㗎冇可能㗎！

資料來源：TVB、鳳凰網