自從多個屋邨，甚至學校被發現有鉛水問題之後，令到全港巿民相當恐慌，雖然程卓端話拉勻一生嚟計應該冇乜事啫，但係大家都仲係繼續諗辦法避得就避，減少飲用鉛水同接觸鉛。

好似最初期嗰陣，港人講地就建議過話用水之前長開水喉2分鐘，而呢啲「隔夜水」就可以用嚟淋花、拖地冋洗衫之類。嗯，不過呢個方法都係治標唔治本，咁樣只係可以減少飲到鉛水嘅風險，但依然同鉛水保持緊密接觸。

而醫管局行政總裁梁栢賢就更加提議飲返多啲水就可以減低體內含鉛量，我諗係以毒攻毒嘅原理啩。到最近偉大嘅教育局局長吳克儉嘅提議就更加有建設性，就係學生可以自備食水返學，咁就可以減低接觸到鉛嘅風險喇。屋企啲水幾時都係安全啲（肯定係，除非唔係）。

不過，計毛毛話，最安全嘅方法，就係用都唔好用，好似呢間酒樓咁，用礦泉水灼菜心就最安全嘞

BTW，其他餸冇寫明話用礦泉水嘅？咁即係⋯⋯

來源：【智將建議】點樣減低含鉛量？