是咁的，有幾個台灣人去南非旅行嘅時候，個司機傾傾下計知道佢哋係台灣人，就哼咗首歌畀佢哋聽，問佢哋知唔知係咩歌，佢哋一聽就知係羅大佑嘅《戀曲1990》啦，話晒咁出名。

個司機哥哥搵咗首歌好耐好耐好耐，足足廿年咁耐，佢周圍問人識唔識呢首歌，但個個都話唔識，而家終於都搵到喇，就開心到喊（堅係喊咗出嚟）。

點解個司機會咁鍾意首歌呢？原來佢係剛果人嚟嘅，細個仲住喺剛果嗰時，媽媽成日帶佢去嗰間華人鋪頭次次都會播呢首歌畀佢哋聽，仲送埋餅帶畀佢，首歌充滿佢同媽媽嘅回憶。後來佢哋搬去南非，餅帶又唔見埋，媽媽都過咗身，佢一掛住媽媽就會哼呢首歌。

最後嗰幾個台灣人send咗首歌畀個司機，佢就好開心又感動咁一路聽一路嗌” Yes!Yes!this is my mother's song!!＂。

好多網友都留言話覺得好感人，毛毛都一樣，睇到濕濕哋（對眼），好掛住媽媽，好想喺公司衝返屋企陪媽媽瞓覺……

資料來源：榮孝洋facebook、羅大佑《戀曲1990》