今年係抗戰勝利七十週年，偉大嘅黨話晒都係中國人民抗日戰爭嘅中流砥柱嘛，除咗加強網絡限制同強勢閱兵之外，日常生活方面，都好應該時該記住戰爭嘅痛苦。強國就有間雪糕公司推出東條英機樣嘅雪條，等同胞們喺消暑嘅同時，都可以勿忘國齒喇。

Poster上面寫住「勿忘國齒 萬人同吃東條英機」，幾有霸氣！強國人民一定要大啖大啖咁咬落條雪條度，報仇雪恨，出返口氣！你會揀卑鄙到面黃、又無恥又黑面，定發詐小白臉款嘅東條英機嚟食呢？

Poster上面仲寫住「反法西斯」，二戰時意大利同日本都係行法西斯主義，而家就用意大利牌子雪條，咬日本仔個頭，強國果然高招呀！食多幾條雪條，就乜仇都報晒鳥！

資料來源：新浪網、微博