毛毛真係唔明，諗極都唔諗明，點解689同志咁致力同阿爺打好關係，又維護香港好客形象，做咁多嘢，都冇人欣賞佢嘅功勞。

港大民意研究計劃出咗最新民調結果，就算唔識計數，都可以一眼睇到市民對佢嘅支持度係愈嚟愈低，低到跌穿40分大關。

問到聽日有得選突手，而你又有權投票，你會唔會揀689呢？超過6成人都係話唔會嘅。1千個人，得2x%嘅人肯肯定會投佢，咁咪即係仲少過689票？原來我哋而家開口埋口叫佢689，已經係幫緊佢懷緬往日嘅超高支持率！

咁低分，都係因為大家覺得佢做唔到嘢啫，其實689同志有喺網誌解釋㗎，千錯萬錯，都係個別地區人士、阻止689盲搶地嘅人同埋創科局未成立，而唔係佢本人嘅錯囉。相信689同志一日仲喺度，一日都仲會聽到佢話有土地問題同創科局未成立，呢篇文嘅題目，一日都仲會啱用。

資料來源：特首梁振英評分/港大民意研究計劃、市民對梁振英出任特首的假設投票結果/港大民意研究計劃、成家，立室？/特首網誌、有土地才會有房屋/特首網誌、市民心中有數/特首網誌