2015年09月03日 星期四
【巧打耳】衛星雲圖驚現卡通人樣
今年好似特別多風打，NASA前幾日先發現三個颱風同時並排嘅奇觀，嗰頭又有一張衛星雲圖畀網民瘋傳，話疑似現人樣喎～等毛毛睇過，颱風「奇羅」同隔籬個颱風並排又真係幾似對眼，加埋下面啲雲中間個窿，成個卡通人樣就出咗嚟，一班豬妹都話巧打耳～
有網民就話似呢隻肥到冇頸嘅柴犬......
亦都有網民話好似不二家嘅牛奶妹，因為大家都係眼睛水汪汪呀嘛，係有少少似嘅，差緊條脷囉～
不過毛毛就覺得似呢幾隻B多啲，唔止對大眼仔似㗎，連嘴仔個形狀都似埋，做埋第5隻都仲得呀低B！
不過打耳還打耳，香港一日有李氏力場保護住，都唔使旨意呢個卡通樣可以埋到身喇，放埋今日假聽日畀心機返工啦港奴！
