噚日係閱兵嘅大日子，偉大領袖毛主席個乖孫仔毛新宇，又點可以唔出席呢個盛會呢？

毛新宇係毛主席嘅唯一嫡孫，已經夠晒威威，唔單止咁，佢仲有「中國第一智將」之稱?！佢不時語重深長長長長長咁發表講話，令節目主持人學到點樣虛心聆聽嘉賓發言，唔好自己齋talk；又試過公開表演高難度動作—採青，雖然係尊貴嘅毛主席後代，但都一啲架子都冇，喺人前盡顯真性情。

唔怪得同志們都咁愛戴毛新宇少將啦！好難得可以見到「紅三代」毛新宇㗎，所以唔少觀眾都走埋去搵佢合照，毛新宇仲好有耐性咁叫排隊嘅同志們慢慢奶，唔好跌親。咁親民，唔怪得有咁多fan屎啦！

坐喺觀禮台嘅毛新宇心情大靚，一面跟住現場音樂大唱游擊隊之歌，一面揮國旗仔。不過呢，面國旗就，好似係，上下倒轉鳥。毛新宇作為中國第一智將，又點會咁智障連拎錯咗都唔知呢？毛毛諗，佢應該係心情太膠先，所以先至一時唔小心啫。

資料來源：youtube（圖一）、youtube（圖二）、文匯報