好多人都話香港樂壇已死，好懷念八九十年代嘅粒粒巨星咁。香港樂壇死咗未毛毛就唔知，不過就同好多人一樣，好鍾意聽返啲舊歌嘅。就好似學友咁呀，佢首《亞視永恆》，呀唔係，《愛是永恆》真係冧死人㗎。

噚日上網見到有個專欄講學友喎，即刻click入去睇下啦，篇文係講學友隻《真情流露》Picture LP點威水點巴閉法嘅。

不過，睇睇下就覺得怪怪地。篇文話學友喺80年代出道嘅時候曾經大紅，但「此時殺出張國榮與陳百強等偶像新人」。哦，原來係因為哥哥同Danny搞到學友要靠邊站！咁佢哋兩位人又靚仔唱歌又好聽，又好難怪佢哋一出道就搶晒學友風頭嘅！

睇返資料，哥哥同Danny 70年代已經出咗第一隻碟㗎喇喎，唔通佢哋搭時光機返80年代做學友後輩？少年，你以為自己好熟識香港歌壇歷史咩，老老竇竇，你真係太年輕喇，事實可能係咁㗎：

嗯嗯，其實五星旗都可以搭時光機返去打日本仔啦，點解哥哥同Danny唔可以去80年代阻學友上位？

資料來源：頭條日報、張國榮/維基百科、陳百強/維基百科、張學友/維基百科