眾所9知，大文豪屈婦人一向唔止對後生仔愛之深責之切，仲好有國際視野，周不時都喺專欄發表偉論，等廣大讀者可以淨係睇佢篇文就能知天下事。

今日屈婦人出咗篇題目係《21年前被犧牲的小生命》嘅文，由敘利亞三歲小難民講到1994年香港嘅一宗不幸命案，再講到佢當年工作嘅感受。

但係筆鋒突然一轉，其實唔使講都估到，心繫香港年青一代嘅屈婦人，又拉埋香港廢青落水，話後生仔會覺得打仗太遙遠，都係繼續爭取公民提名真普選、爭取趕走水貨客、趕走689罷喇！嘩，咁樣樣，邊度跟得切呀師傅！

大文豪不愧為大文豪，由世界大事慢慢收返落香港，再貫穿一路以嚟咁多篇文嘅中心思想：教精班廢青。毛毛真係好認同屈婦人，香港廢青淨係關心香港有冇真普選，完全唔理其他大事，視野真在太窄！好在有屈婦人為我哋提供萬能金句，當你想怪人哋乜都唔理嘅時候，只要咁講，即刻霸氣盡現，好有道理咁樣樣！

資料來源：晴報專欄