唔知扔嘢出街是咪香港人其中一個減壓方法呢，周不時都會有人扔嘢落街嘅，唔係花盆就係高踭鞋個踭咁，唯一唔見有嘅就係錢囉。

天水圍有個住宅管理處可能見情況不受控制，所以出咗張通告，叫各位街坊唔好再扔嘢落街，唔係就扣你分。嘩，唔聽話會扣分喎，扣得多分會冇屋住喎！香港人最驚係咩？冇樓呀嘛！咁大劑，點都要聽晒管理處話，佢叫你行東就行東，食西就食西。

但係佢最後，好鄭重，好嚴肅咁，呼籲住戶將domdom套包裝紙拋出窗外……又粗體又underline咁，好似唔照做會扣100分咁喎大佬。

呢個住戶九成係睇到張通告，為咗保住間屋，所以乖乖將用完嘅domdom套一嘢飛落街沙唷啦啦喇。不過人哋係叫你拋個空空如也嘅包裝咋，唔係滿載而歸嘅套套呀，小心畀人扣分扣多兩錢重喎！

延伸閱讀：天降用過安全套 網民：攞去炒蛋