眾所9知，的士司機一向充滿人情味，又熟悉香港嘅大街小巷，兼夾掌握各區最新嘅交通情況，務求為各位乘客提供最優質嘅服務。而有一點，更值得欣賞嘅係，佢哋對所有人嘅態度都係一視同仁，並唔會因為你係男神、名人定係普通廢青而偏心！
最近，有幾個名人都分別喺佢哋嘅facebook或者微博度出post同大家分享佢哋嘅搭的士經歷。
前組合「Freeze」嘅成員甄詠珊搭的士嗰陣，就得到司機熱情嘅問候，同埋載住佢周圍兜風，沿途欣賞由太子去到尖沙咀嘅風景，最後仲只係係咁易收80蚊遊覽費咋，真係抵到喊！
.png)
雨僑要過海，咁就call的士啦，佢都算幾好彩，遇到個肯車佢過海嘅的士司機不特止，個司機仲非常貼心咁幫佢揀咗一條稍為新啲嘅東隧而唔行舊啲嘅紅隧，只係嗰日咁啱遇上土地問題搞到塞車⋯⋯啲司機服務咁好，要由香港島搭的士去香港島都唔容易㗎，雨僑同毛孩講，話佢試過要搵慈母幫手先至搭到呀。雨僑仲話畀毛孩聽，佢好想搵一日瘋狂搭短途的士，過海試行紅隧，做返個統計畀更多人知道今時今日佢哋嘅服務態度有幾咁優秀喎！喂，搭嗰日記得搵埋我呀！
G-Phone就好有幸咁遇到一個富有責任心、又誠實又有自知之明嘅司機，係唔識去九龍塘同又一城就一早話你聽唔識，寧願犧牲一單生意都唔會呃你，唔識又扮識咁。仲有佢遇上另一位慈父司機亦係非常值得表揚，愛女心切，有生意都唔做，睇家庭重於工作，好爸爸啊！
而男神王宗堯亦都冇因為男神呢個身份而得到唔同嘅對待，男神同毛孩講，佢今朝要過海去觀塘啦，咁佢食咗好多個檸檬之後，終於畀佢遇到一個好脾氣嘅專業的士司機。咁男神一上到車就同司機講話要過海啦，司機就立馬彬彬有禮咁問佢目的地，然後就當機立斷咁決定行東隧，但係中途塞車是常識吧。咁阿司機嘅忍耐力都算幾高㗎喇，只係自己默默咁發出一啲「?～唉～哦~欸～嗯」嘅怪聲咋⋯⋯幾經辛苦，卒之出到觀塘，不過阿司機又遇上另一個考驗，就係佢唔多識路囉，然後阿司機見男神好似趕時間，就諗住直接喺街口畀男神落車，唔好因為唔識路而耽誤時間嘛，而最後喺男神嘅指導下，司機終於成功車到男神去目的地喇！唉，阿司機，呢條路唔易行啊！Between，男神唔好嬲豬啦，毛毛呵返！
