雖然而家天氣仲好熱，但其實數下腳指，仲有兩個禮拜就中秋喇。啲月餅而家唔sell你幾時sell呀？人哋一年四季淨係而家先有得做你生意咋，由於有量嘅空閒時間，月餅商當然就唔會偷懶，絞盡腦汁咁設計多啲新款口味嘅月餅畀大家試啦！呢幾年毛毛都試過唔少咩咖喱味月餅呀、榴槤月餅呀咁，自問都已經好有膽色，之但係我見到呢兩款，就真係表示淆底了。

強國話明強國，梗係連口味都強過人啦！腐乳味嘅月餅，唔知係鹹蛋加腐乳、蓮蓉加腐乳，定係鹹蛋加蓮蓉加腐乳，定係齋腐乳呢？有冇勇武嘅巴絲可以試完話我知呀？

仲有呢款，雖然啲餡好普通，都係雙黃蓮蓉，之但係聽個名就知係勁嘢喇！中國探月工程嘅合作伙伴嚟㗎，膠科技嚟嘅呢，分分鐘你哋平時食開嗰啲原來係A貨月餅嚟，呢啲先係最正宗，由嫦娥親自傳授功夫嘅月餅嚟㗎呢......