噚日有個著住校服嘅學生妹，孭住部仲高過佢個人嘅古筝搭港鐵，立馬就有3個港鐵職員出嚟出手相助，呀唔係，係出手阻止佢入閘至啱。

有好多廢青網民見到呢張相之後，就喺網絡上瘋傳，炮轟港鐵，錯晒，成件事錯晒！我係指班廢青錯晒呀！港鐵車廂空間有限，資源有限，就梗係要好好分配使用嘅先後次序啦！嗱，以下呢啲對振興香港經濟、促進社會發展有大力幫助嘅，咪唔使check都上到車囉！

強國遊客一場嚟到，唔拖返幾十個篋，邊度夠位裝戰利品凱旋回歸強國呀？唔係佢哋咁畀得起錢支持香港零售業，你哋真係食榖種咯。

冇拖到篋出街嘅，買完嘢咪用手推車仔頂住先囉。

公德心比較好，唔會推走人哋架手推車嘅，就自備架BB運貨車。

整齊啲嘅就一箱箱一袋袋咁pack好晒，又唔會有「危樓倒塌」壓親人嘅危機，又唔會東一件西一件咁霸佔好多位，抵讚！

港鐵一向對於推動本地經濟發展不遺餘力，大大罐嘅奶粉都預留咗空間畀佢哋上車，呢啲小型生意又點會打擊呢？

另外，話晒都係同行，交通業界嘅代表就當然可以有優先使用權啦。

至於民生，都係另一個佢哋考慮嘅因素，遇有巿民要搬屋、入貨乜乜乜咁，如果只係單一兩件傢俬，都會好慷慨咁借出車廂畀佢哋當貨車用。

你話嘞，學生妹件古筝同呢張床褥一泊埋，邊個有需要啲吖？就算唔比較需要，孔融讓梨都聽過啩，後生仔禮讓啲，唔淨止讓座，讓埋空間畀人是常識吧？

來源：膠山有福（高登討論區）、Ka Lun Chan、涂東東專頁

延伸閱讀：【港鐵真好客】載客列車變載貨