噚晚有網民見到一個學生妹畀幾個港鐵職員圍住，話佢個古箏係大件行李，張相一擺上網，一大班網民就即刻圍插港鐵，話港鐵大細超、有雙重標準！更加有網民摷返港鐵FB成大半個月前嘅post嚟插！

個Post本來就講緊呢排逢禮拜五嘅黃昏六點，港鐵香港站都會有人表演嘅，例如夾Band呀、彈琴呀、唱歌呀咁，當然仲有彈古箏啦！

點知一班網民就即刻瘋狂抽插，I mean佢哋瘋狂抽水同圍插港鐵，有網民問拎古箏要罰幾錢，亦都有網民話：「咁多部大大部嘅古箏，港鐵無勸籲佢哋去第二度表演咩？」。其實港鐵幾時有雙重標準吖，唔通嗰幾個港鐵職員見個學生妹天生一副音樂家相，想問佢有冇興趣一齊做表演又要話你哋聽咩！

另外，港鐵之前都話車站裡面原來準備咗30000幾包餅同樽裝水畀大家應急㗎。吓？乜唔係喺港鐵範圍內飲食會被罰5000蚊嘅咩？

哎哎，你咪咁厚多士啦，又喺度自作多情！人哋話30000幾包餅同水係要嚟畀大家應急之嘛，都冇話畀你哋食，未聽過咩叫望梅止渴咩？

來源：MTR（車站藝術表演）、MTR（應急孖寶）