FFx《Sugar Baby》個MV一出，即刻畀網民瘋傳，毛毛知道大家除咗欣賞佢哋嘅舞姿同歌聲之外，仲好想知道呢個神級MV係點樣製作出嚟嘅，所以毛毛就即刻電話訪問咗其中一位《Sugar Baby》MV嘅製作人員，了解吓MV製作嘅過程～

毛=毛毛
製=《Sugar Baby》MV製作人員

毛：當初佢哋係點樣搵你哋拍嘅？
製：是咁的，我哋其中一個人識得個經理人嘅，咁搭吓搭吓佢就搵咗我哋拍囉 （係囉，直頭係搭埋膊頭?）。

毛：聽講得900蚊「筆直」咋喎，你哋又咁抵得諗嘅？
製：佢話畀機會你哋班學生儲經驗喎......仲話條片會上好多報紙雜誌，當整靚啲個portfolio......

毛：咁900蚊「筆直」包啲咩？
製：Er...包租囉，我指租器材呀。場地同梳化服（即係梳頭、化妝、服裝）都係佢哋自己嘅，嗰900幾蚊租完器材就冇晒錢啦。

毛：咁人咪即係零人工？
製：（不要再說了.jpg）所以有啲人話900蚊分畀10個人，每人分到90蚊係錯嘅，根本就1蚊都冇，仲要係導演追幾次先有！

毛：嗚呀，咁最後900蚊租咗咩器材呀？
製：咪LED呀、C-stand呀、沙包，track嗰啲囉。

毛：55，都算幾齊全喎⋯⋯咦，咁cam呢？
製：機咪我哋自己出囉，都係用單反啦......

毛：哦哦，好專業，我指你哋專誠為呢個作業付出好多。咁成個MV大約拍咗幾耐呀？
製：6至8個鐘左右啦，唔記得喇，都成一年前嘅事。

毛：呀，咁講返啲近啲嘅，條片夠近喇啩，我見到片尾credit嗰度，有個Ass Director？
製：係。呀，唔係，唔係特登㗎，純粹係唔小心，囉。同埋本身我哋唔想出㗎，但後尾佢要我哋出credit，話畀佢用......

毛：出畀佢用，即係點？
製：Er...

毛：喂，講咗咁耐，入返正題先，其實嗰幾個女仔是咪都係學生嚟？
製：Er......我唔方便講喎。

毛：咁真人靚唔靚呀？
製：我私下話你知啦.....

毛：真人靚啲定上鏡靚啲呀？（嘟嘟嘟⋯⋯）

唉，講咗咁耐咁難得入到正題，點知⋯⋯BTW，頭先又有網民捉到個MV有錯字喇，話sugarbaby串錯咗做sugerbaby喎......打錯字幕又點喎！咁低budget，係咁㗎啦～