叫得涼亭，梗係要涼先至符合國際標準啦。呢個位於太湖花園嘅四通八達無頂透氣通風涼亭就絕對達標嘞。

而作為一個涼亭，佢唔淨止可以畀人喺度唞涼，臨近中秋，呢度更加係一個觀星嘅好地方！

瞓喺度，望上去，一望無際㗎！想睇星又唔多識分東南西北方位嘅，嗰幾條樑幫到你（可能）。

聽聞呢個涼亭已經涼咗成年。點解唔加返個頂？傻豬嚟嘅，要成30幾萬呀！

畀錢事小，而且加返個頂之後，咪再冇得有風喺上面吹落嚟囉，個亭咪唔能夠充分發揮佢作為一個涼亭嘅作用囉，咁咪又會畀人話佢係33萬廢墩避雨亭啲friend囉！所以嗰個頂，係萬萬不能加啊！