金雀餐廳噚日貼咗張告示話會停業呀！唔知金雀餐廳有咩巴閉嘅話，就真係少年你太年輕喇，王家衛嘅《花樣年華》同《2046》都喺呢度拍㗎。

《花樣年華》入面周慕雲同蘇麗珍鋸扒嘅一幕，加埋懷舊嘅餐廳環境，真係好靚，毛毛都In the mood for love喇……

不過好可惜，開咗50幾年嘅金雀餐廳用「未能與您走到二零四六，榮幸與您渡過花樣年華」同大家say goodbye，有侍應話要重新裝修，亦都有報道話係想另開新金雀呀！希望只係輕輕裝修下，同埋可以keep住陣60年代嘅味道啦。

趕唔切去金雀餐廳影相留念/打卡都唔使太灰9嘅，香港仲有好多餐廳曾經係電影取景地方㗎，post相嘅時候記得加返一兩句電影對白，文青味100%上升。

《重慶森林》

王家衛嘅《重慶森林》入面，王菲就係喺大牌檔遇到PC633㗎喇。點解朝偉無論鋸扒定食碟頭飯都可以型過人㗎！嗚呀！

地址：中環士丹利街大牌檔

《十月圍城》

陸羽茶室30年代已經開業，76年先搬到而家士丹利街嘅鋪位。陸羽茶室現址曾經係清末革命報章《中國日報》報社，而梁家輝喺戲入面扮嘅陳少白就係《中國日報》創辦人四大寇（孫中山、陳少白、尢列、楊鶴齡）之一喇。

陸羽茶室／地址：中環士丹利街24號

《竊聽風雲》

有50幾年歷史嘅民聲冰室最出名係好似一座山仔咁嘅鹹蛋蒸肉餅，嗌一碟應該可以撈幾碗白飯！不過《竊聽風雲》入面嘅金融大鱷馬志華 (王敏德) 就冇叫到呢碟招牌菜，只係叫咗個豬扒丁囉。

民聲冰室／地址：大坑浣紗街16號地下

 《月滿軒尼詩》

聽個戲名都知套戲同灣仔好有關係啦，而灣仔嘅檀島咖啡餅店就係學友同湯唯成日見面嘅地方喇。毛毛都想搵到個肯陪我食蛋撻嘅女神呀……

檀島咖啡餅店／地址：灣仔軒尼詩道 176-178 號地下

《我老婆唔夠秤2我老公唔生性》

睇個裝修就知係中上環旺中帶靜嘅西餐廳啦，鄭伊健就係喺呢度識到又識諗又young過阿Sa嘅大學生㗎喇（不過毛毛都係鍾意阿Sa多好多好多）！

Corner Kitchen／地址：上環普慶坊20號地下

資料來源：明報、Wong Kar-Wai Express、woodenbell319.blogspot.hk、youtube