我好想中咗頭獎，咁就有嘢唔使做，腦細又吹我唔漲……相信唔止毛毛，全香港人發夢都想中六合彩。有網民就為咗嚟緊嘅中秋金多寶大手買入幾十張飛，盡顯霸氣！

一飛廿蚊，照咁睇呢位網民為咗發達夢真係好抌本喎！不過都正常嘅，事關今期中秋金多寶頭獎如果一注獨中有成八千萬呀！

嗱毛毛計過喇，如果用最低工資$32.5嚟計嘅話，應該做到死再輪迴投胎到下一世都唔會儲到八千萬。但如果今鋪中咗頭獎呢，咁就既方便又快捷啦！到時上樓真係不再是夢！其實我都有偷偷地做過少少功課㗎（是咪好勤力？）：

1. 地利

要中獎，一係技術性中獎、一係幸運之神眷顧你中獎，你連女神都未冧得掂，都唔慌有幸運之神照住㗎喇，咁就要靠技術！根據統計，有啲投注站係有技術性中獎嘅往績！

2.冧把

   就算揀啱個地點，你都只係贏咗一半，仲要揀啱冧把先得。嗱，賽馬會就數波仔咁數過，每個冧把被攪出嘅次數，好似10號仔咁，就總共開過318次喇，不過過最少嗰個19號，都出過243次㗎，你咪即管參考吓囉。

3.人和

有天時、有地利，都仲要人和先成事。由幕後「黑」手定係上帝之手畫飛，成個乾坤都可以被扭轉。傳說童子嘅尿除咗可以辟邪之外，童子嘅手亦都可以帶嚟好運㗎（好似係）！我見28年前肥姐齣《富貴迫人》都係用呢個方法嘅～ 不過如果我冇個童子喺身邊，揸住隻筒子嚟畫，我諗都得得地啩。

4. 念力

     聽講，每個人都有一種特殊嘅能力，叫做念力。當你不停念不停念不停念不停念不停念不停念不停念不停念不停念不停念不停念不停念⋯⋯嗰陣，就有機會影響到個結果，中頭獎㗎啦！不過聽聞喺攪珠前一晚嘅三更左右，喺路中心起勢大聲嗌你諗住嘅冧把，就能夠傳送到你嘅念力出去，咁就會有九成機會中獎，仲要係頭獎?呀（好似係）！

資料來源：小心駕駛(討論別人駕駛態度)、香港賽馬會