毛毛豬平時就唔會食即食麵呢啲咁唔健康嘅嘢，不過呢間位於中環嘅大排檔，佢嘅全拼餐($42)好食到，毛毛豬冒住肥嘅風險都要去食呀！

佢嘅煎蛋係連埋大大粒嘅午餐肉同司華力腸一齊煎，煎得啱啱好，非常香脆。其他餐廳可能都會有腸仔煎蛋呀咁，不過肯定就唔會夠呢度足料。啲午餐肉仲要係厚切㗎！

煎蛋下面鋪有椰菜，等你食咗咁多肉之後食返幾條菜安慰吓自己。之後就到個麵，煮得好彈牙，不過湯底味道偏淡，毛毛豬鍾意濃味啲嘅～

聽講呢度嘅三文治都好出名㗎，不過毛毛豬去到嗰陣佢已經賣晒……腦細仲話，如果要食全拼餐就要等15-30分鐘！唉，想食好西嘅話，除咗要快之外，仲要有埋耐性呀！

餐廳資料：

裕興咖啡

地址：中環士丹利街82號舖

營業時間：星期一至五: 08:00-13:45 (12:00開始午市) 星期六,日及公眾假期休息