為咗自拍，你可以去到幾盡？你以為你忍住肚餓畀相機食先就已經好盡？碎料啦，用條命仔搏盡先叫盡嘛！

嗱，你食蕉人食蕉，人哋爬到346米高嘅中環中心上面自拍完再食，咪霸氣囉！

不過，以人類總係喜歡睇人PK嘅心理嚟計算，愈PK先會愈呃到多啲like，所以......畀蛇錫又好、畀車hi到又好，都記得自拍咗張先！

人類已經進化到死都要自拍嘅境界，根本冇嘢可以阻到人類自拍！不過最近就有數據指出，淨係今年（今年未完㗎留意返）因為自拍而死亡嘅個案就有12宗，而當中主要嘅死因係自拍嗰陣唔小心跌親呀、畀車撞到呀咁......

睇嚟自拍一種危險活動嚟㗎喎......連俄羅斯政府之前都整咗個溫馨提示畀市民，提醒佢哋自拍嗰陣要小心，留意一下周圍嘅環境～係細心嘅！

老老竇竇，搞到自己咁危險都係為咗個like啫，其實想呃Like......去淘寶買咪得囉，慳水慳力，方便快捷，最緊要係安全吖嘛（網路安全畀人斷正另計）。

來源：攝影札記、The Telegraph、ahnjun、新唐人