毛毛豬今日唔多開心呀，我今朝上磅，肥咗0.1磅呀！嗚呀！毛毛豬宣佈「減肥行動」即時生效！今日一於食「青」啲，文青個青呀！

聽聞最近太子開咗間行文青路線嘅新飯堂，個名仲好得意，叫「神經餵飼」，毛毛豬當然要去睇吓佢有咩餵飼到我啦！佢每日嘅lunch set都唔同，今日就揀咗麻甩乞丐蘑菇飯($52)。

咩啫？文青同麻甩唔可以同時並存㗎咩？兵仔都唔止一個啦。雖然我都唔太鍾意麻甩呢個term，不過我貪呢碗飯夠晒清⋯⋯新健康，用唔同嘅雜菇一齊煮，再加上微辣嘅蘑菇忌廉汁吊返起個味，唔會話無肉食就會好寡。而且食完都唔使驚會肥吖嘛！

而間舖嘅裝修，就分咗上下兩層，下層主要係畀人食吓飯飲杯嘢咁，上層就幾闊絡下，放晒啲榻榻米地墊喺度。

仲有啲手作仔賣添！

仲唔係文青（即係我）影相買嘢呃like嘅好地方？毛毛豬去嗰陣都見到好多港女影緊相，我都唔執輸，迫我啲兵仔幫我影咗幾十張派軍糧，hehe！啲裝飾真係巧令令㗎~

環境亦都非常舒服～

毛毛豬坐坐吓都唔想走，因為真係好舒服。睇嚟我嘅神經已經成功被餵飼，嗯，治癒了，聽日可以再食過（跳起Yeah）。

餐廳資料

神經餵飼

地址：太子砵蘭街434號地鋪

營業時間：12:00-21:00

電話：26734722