是咁的，喺元朗嘅一個停車場，出現咗一個連Facebook大神都未解答到嘅神秘符號，Oh My God！

嗱，唔好諗邪嘢，交通指示標誌嚟㗎，應該。不過到底佢係想講直行向左轉再向右轉，定係轉入嚟再轉返出去，定係向左走向右走呢？God knows.

最神秘嘅地方係，如果你跟住個標誌向前直行嘅話，就會發現根本冇得轉左同轉右，因為⋯⋯佢係一條掘！頭！路！

嗱，做人應該要大膽假設、小心求證嘅。計我話呢，呢條掘頭路應該係九又四分三月台嘅A貨，只要有魔法同勇氣就可以衝過去，而呢個標誌就係古時流傳落嚟嘅魔法陣，只要你企喺上面向左轉之後再向右轉，轉足七七四十九個圈，再大叫一聲：「席席bird極！」咁就可以破地獄，走返出去㗎喇（好似係）。嗱，前半part我就做咗喇，淨返「小心求證」嗰部分，就交畀你哋去做喇，證完返嚟話我知。

資料來源：小心駕駛(討論別人駕駛態度)