粉紅色，真係可遇不可求！尤其是粉紅色嘅櫻花，就更加係港女最愛！如果粒櫻花可以食埋落肚，咁就更加滿足到港女們嘅粉紅少女心啦！

好靚呀！毛毛豬一見到就已經心心眼！介紹返先，佢個真名其實係叫做水信玄餅，係日本傳統甜品嚟，不過而家唔使買機票過日本都食到嚕～好似水滴一樣嘅水信玄餅（$48），中間有朵淡粉紅色嘅櫻花，真係巧浪漫～毛毛豬收花就收得多，食花都係第一次咋！落埋黑糖漿，入口都唔會太甜，不過就好似食緊一嚿有花香嘅啫喱咁。NVM啦！夠靚夠呃like咪得囉～

食完個口乾乾哋，可以飲返杯玫瑰桂花烏龍茶（$32）。杯面撒滿玫瑰花瓣，不過入口有啲甜，可能因為落咗太多玫瑰糖漿啦～btw，聽講烏龍茶有助減肥㗎喎！Yeah！等我飲多幾杯先！

店主應該真係好鍾意花，除咗嘢食用花之外，舖頭入面亦都擺咗好多乾花、鮮花做裝飾㗎～

望見咁多花，搞到我都好想買返啲返屋企擺呀！等我叫吓我啲兵仔先～

餐廳資料：

小房子

地址：旺角豉油街67號2樓

營業時間：星期一至日: 14:00-23:00

電話：6773 6915