每日都有大量巿民目膽咁運啲大型樂器同畫框入港鐵，令到一班港鐵職員嘅工作量大大增加。你知啦，就算係大提琴，都有唔同大細嘅大提琴盒，有啲盒高過130cm，有啲盒有高唔得過咁，靠目測未必咁準確，等陣測錯咗，一係就畀你班廢青鬧，一係就畀公司鬧，咁梗係萬事小心，度清度楚先好啦。

有巿民最近就遇到一個工作態度相當良好嘅港鐵職員，仲拍低咗少少片段公開表揚佢！

第一讚：謹守崗位，一眼關七

話說有準備出席綵排嘅巿民，拎住部大提琴去到大圍站，一落電梯行咗都唔夠廿步，呢個一眼關七嘅職員就已經喺云云路人之中，即刻spot到呢件大型障礙物，疑似會影響到其他乘客嘅安全，同埋霸佔多一個乘客嘅企位，於是立馬就走去了解、跟進下。

第二讚：主動了解，實事求事

不過，港鐵職員好講道理嘅，又均真喎，目測完唔太肯定高唔高過130cm之後，就拎咗個神器：量尺出嚟，又度高度又度闊度咁，跪晒地咁度㗎，態度相當認真。最後度完之後發現原來係合符入閘標準嘅，肯定咗咯，咁咪放行囉。

第三讚：小心謹慎，細心提醒

呢個職員仲相當細心，特別提醒呢位巿民要留心港鐵嘅規例，表示如果佢個盒再大啲就唔畀入㗎喇，連巿民之後可能遇到嘅問題都諗到同埋作出溫提，真係窩心到呢~

另外有網民見到咁多港豬咗呢啲小事就咁頭痕，提議咗個方法畀各位音樂家，大家只係需要做多少少功夫，寫幾粒字，貼多張紙就應該一路暢通無阻㗎喇（好似係）。