萬眾期待，緊貼年輕人潮流嘅慈母Facebook今日開張大吉喇！

個Facebook夾晒時辰八字，準時四點post咗條片，一開波就請嚟闊別銀幕一年嘅四點鐘許Sir同大家say Hi～毛毛都Hihi返佢先，咁耐冇見，要Hi多幾次先得！

跟住許Sir仲請咗隻疑似嚟自強國蠟像館嘅親善大使出嚟，好在有慈母啲正氣鎮一鎮啫，唔係毛毛以為Halloween未過又到下年七月呀！原來係動畫版許Sir 2.0，以後會唔會淨係得2.0睇，冇許Sir本尊睇㗎？嗚呀！

呢隻許Sir 2.0係就係冇許Sir本尊咁型仔，不過一樣識「或者我再重申一次」㗎，雖然講唔出啲咩大道理，不過真係好有親切感！呢個facebook account開咗大約一個鐘已經有超過4700個人like喇！咁受歡迎，唔知慈母會唔會考慮開埋17做直播呢？不過睇怕係都要等多10年先開到囉⋯⋯

封面圖片來源：Hong Kong Police

資料來源：Hong Kong Police

延伸閱讀：【FB dislike系列】慈母最快下個月開page！