啲科學家就成日都問十萬個為甚麼，不斷重複去驗證佢哋嘅假設，而女人天生就係一個科學家，每分每秒都不斷去問重複又重複嘅問題，得到答案之後又唔心息，繼續追問、追問、追問，直至永遠，阿們。面對住呢啲無止境、連科學都驗證唔到嘅問題，港男們！不要怕！毛毛收集咗港女最常問嘅5大難題，睇正解啦～

1. 我今日有咩唔同呀？

嗱小心喇，通常女人問親呢個問題，都一定係有啲嘢唔同咗先會咁問你。可能係剪短咗2cm頭髮、修咗眉、或者係剃咗腳毛，不過都可能乜都冇變過，總之佢其實只係想你留意佢多啲，你咪當玩緊找不同咁，畀個答案佢囉！不過千祈唔好答佢：「你老咗一日」囉（雖然呢個係事實）！

2. 我今日靚唔靚呀？

靚。法官大人我冇其他答案喇，不過可以自行延伸落去：最靚係你啦、我BB幾時都咁靚……等雖然嘔心但係港女又會buy嘅說話，怕凍嘅就著多件衫先答佢囉。

3. 你覺得我係咪肥咗呀？

如果你真係好誠實好真好true咁答佢肥咗，咁你就真係肥咗喇，fail呀！喺愛情嘅世界入面，女朋友肥即係好瘦，瘦……即係好很瘦！我講咗啲咩，你自己參透下啦！

4. 你有冇掛住我呀？（但明明男朋友就係隔籬）

同港女講嘢切忌理性同邏輯，就算佢真係成個人棟喺你隔籬，你都要答：「有！」答嗰陣對眼千祈唔好周圍望，唔係等陣識讀心術嘅佢哋就會話你對眼射向左邊係代表講大話，反白眼望向上即係你要諗過先答，望地下又話你心虛，總之望邊都死！最好就睥望實佢哋對眼。

5. 你對我仲有冇心跳嘅感覺呀？

其實正常人都會有心跳嘅……嗱嗱嗱如果你咁講肯定會死無全屍，到時有心跳都變成冇呀！佢鍾意聽，你咪答句有囉，反正又冇講大話！