以前見到人哋做伴娘同姊妹，就會好羨慕有得扮靚靚，而家都有份做咯，就知道，自己唔再係十八廿二喇…… 雖然毛毛豬對做姊妹有啲驚驚，不過都會上網睇下人哋有咩經驗嘅。

最近有網民話佢做姊妹團嘅時候遇著個世界級姊妹！佢鬧個姊妹唔幫手打點之餘，仲淨係掛住影相、補妝，同獵食，同班兄弟團有講有笑。

跟住唔少花生友都留comment話佢哋都遇過啲唔做嘢嘅廢青姊妹。其實毛毛豬真係唔係好明佢哋嬲乜囉，都話明做姊妹，唔係做阿四囉～斟茶遞水數人情點名呢啲粗重嘢交畀伴娘做咪得囉，做呢啲先係正經事嘛～

咁難得有機會chok到盡，梗係要影多幾張自拍派下糧～

又唔可以淨係post自拍嘅，廢事畀人以為自己獨家村嘛～（溫馨提示：企個冇咁靚嘅隔籬）

成班兄弟著住套老西，叫毛毛豬點忍呀！呀sorry呀，拎返啲矜持出嚟先，係識多幾個朋友仔，擴闊下圈子啫～新娘就話搵到好碼頭上岸啫，而家係咪幫下毛毛豬都要計先？

封面圖片來源：親子王國

資料來源：親子王國