Mola Mola……執下又一個，執下又一個，而家連觀塘渡輪碼頭都因為使用率低，下個月就要收返畀正苦喇！

而家正苦就搞緊招標活動，如果過咗期都冇人認投嘅話，個碼頭好大機會應該可能大概或者會畀人拆走㗎喇！你哋睇啲郵筒呀、天星碼頭呀嗰啲就知香港正苦對於保育工作幾咁落力㗎啦！

話呢度使用率低？而家就用畀你睇！有組織諗住喺佢被收走之前，留返個動人時光等第日可以常回看，於是就喺度搞個集體睇電影活動。

其實呢度平時都好多戲睇㗎，認真，事關呢個碼頭係大台御用碼頭場景之一嚟㗎，好多劇集都喺度拍嘅。不過拍咗可能又冇人睇，睇咗又冇人記得啫……

香港土地問題咁嚴重，呢個碼頭應該都會好似以前嘅中環碼頭，到最近嘅深水埗欽州街小販市場咁，畀人拆咗嚟起樓㗎喇（應該係，除非唔係）……不過起極我都係上唔到樓之嘛，嗚嗚！

封面圖片來源：wikipedia

資料來源：政府產業署、Goooood Secrets 神秘電影院、KK ground