事隔一年，反應迅速嘅警方終於正式落案起訴暗角柒警傷人罪喇。打完人都可以收半糧咁把炮，相信大家都好想學下佢哋嘅拳術，而家有機會喇，最近暗角出現咗幾張新嘅貼紙，教大家「單黑太極拳」呀。

呢柒個黑色戴住公安帽嘅剪影分別示範咗柒個太極招式，教大家自衛武術，嗱，記得淨係用嚟自衛呀，唔好主動攻擊人呀，習武之人，唔打爛仔交嘅。

舊年柒警事件發生之後，暗角都出現過唔同嘅畫作同標語。

毛記電視城都一樣有個好暗嘅角落寫住暗角，提醒我哋世界上除咗娘娘淨係覆高富帥機唔覆你機之外，仲有其他事，更加值得我哋問一句：「公平咩？」。