好多人成日睇大台邊睇邊鬧，又話劇本老土又話人哋穿崩，而家改變大台嘅機會嚟喇！大台又請人呀！

今日大台喺Facebook出咗post話要請PA呀！仲勁有心機咁用人氣大製作台慶劇《張保仔》嚟包裝，拍咗段短片，話說洪永城等埋位期間，PA妹妹走去叫佢換衫，佢就竟然捉實PA妹妹隻手唔放？哦，原來係借機會介紹PA⋯⋯有咩做。請人都搞咁多嘢，真係好符合佢要求寫嘅「對電視節目製作有 heart」喎！

有heart呢樣嘢就咁講有啲抽象，等毛毛用返《張保仔》做例子，話畀你知點樣為之有heart池啦。

有前瞻性

雖然香港未通過辱警罪，但《張保仔》第一集已經預言畀大家知第日慈母會有幾大官威，極具前瞻性。咁關心香港前途，唔係有heart係咩呀？

教育觀眾

保護環境乃係大勢所趨，大台肩負起教育觀眾嘅重任，做節目有heart就係要成日記住呢個宗旨，一有機會就要搵位入教，就好似示範如何用廁所板當鏡，同埋循環再用屠龍刀咁，身體力行支持環保。

做足準備

實力演技派女主角皇帝妹部機用咗咁多集都仲有100%電，有人話一啲都唔真實喎。嗱，說話就唔係咁講，個PA只係準備充足，差足晒電啫，確保一個唔好彩NG 100次都仲有電使嘛。有心做製作就係連呢啲細微細眼嘅位都跟到咁足囉！

選角配合時代背景

係人都知清代嘅時候鴉片為禍，老百姓食到個個奀挑鬼命，所以劇入面就出現生得特別瘦弱細粒嘅清兵，話畀大家知吸毒嘅禍害。連只係出現一個鏡頭嘅臨時演員選角都咁嚴謹，咪叫有heart囉。

心口有個勇字

睇咗咁耐，咩叫有心？其實講乜都假，心口有個勇字就最實際嘞！

但係，我啱啱發現，大台已經del咗post喇......哎呀，我真係好有heart㗎，點解唔畀機會我喎......

封面圖片、資料來源：TVB

延伸閱讀：【好大的官威】香港幾時有條辱警罪？、屠龍刀亂入《張保仔》