香港嘅土地問題真係好嚴重，搞到香港人要用盡每一吋空間，連巴士站頂都要用埋！

呢個巴士站係位於粉嶺華心邨，先唔好理到底佢係點樣拎住幾個放滿藥材嘅篩，再爬上巴士站頂放低；單單係佢突破咗土地運用嘅盲腸同埋勇氣，就已經好值得我哋學習啦！有邊個諗到，原來巴士站頂咁有用！話時話，香港咁多個巴士站頂，齋棟喺度唔用咪盞嘥～只要我哋識得加以利用，解決土地問題仲使乜成立創科局喎！多謝晒呢位仁兄帶嚟突破性發展！

住宅   

班廢青成日都話上唔到樓，一於將啲巴士站頂改建成住宅，居高臨下，交通方便，仲有360度環迴風景睇?！

大媽舞台

啲大媽成日都畀人話阻街，將個表演場地由MK搬去巴士站頂，你有你等車，佢有佢跳，問題咪解決晒囉！

乘客休憩空間

好多人都鍾意喺巴士站進行一啲休閒活動（睇返：【土地問題】巴士站變身羽毛球場），其實大可以將啲站頂變成乘客嘅休憩空間，佢哋鍾意打波又得，做愛做的事又得，得咗！

封面圖片來源：劉冠傳

資料來源：劉冠傳facebook