當投唔到票係因為要等埋發叔，遲到係因為要欣賞國旗呢啲原因出現了嘅時候，毛毛天真咁以為佢哋已經係無敵，點知，就有個鬼妹仔出嚟挑機！

話說個鬼妹仔叫Maddie，佢同普通細路冇分別，都係要返學、做功課，但係佢比其他細路贏在起跑線上，當人人都成功靠父幹嘅時候，Maddie嘅成功係靠爺幹！事關佢有個好超然嘅阿爺，最近拎咗諾貝爾化學獎呀！

阿爺攞獎關佢咩事？梗係關啦！諾貝爾獎喎，直情係成個家族嘅驕傲，要大事啪啪啪慶祝至得！Maddie為咗同阿爺慶祝，好孝順咁放低佢嘅學業⋯⋯一日咁多。咁咪要遲交功課囉，不過唔緊要，開明嘅老母幫佢寫咗封家長信畀老師：Maddie要遲交功課一日，因為佢阿爺拎諾貝爾獎！嘩！呢啲咪霸氣囉！

雖然毛爺爺冇拎到諾貝爾獎，但毛氏家族個個都係精英，總有機會拎獎嘅，下次要遲交稿嗰陣，腦細你明點解㗎啦～

來源：每日鏡報